كتبت أميرة السمان
وجهت الإعلامية مفيدة شيحة سؤالا لمتابعيها وخاصة السيدات قائلة: “لو عندك الفرصة.. تختاري اللي يريحك ولا اللي تحبيه؟”.
وأضافت “شيحة”، “لما الدنيا تخيرك بين اللي بتحبه و بين اللي يريحك.. هل تختار اللي بتحبه بمنطق حبيبك هتبلعله الزلط، ولا تختار اللي يريحك بمنطق إن الحب هييجي مع الجواز والعشرة؟”
وتابعت ‘”ناس كتير بتنحاز لفكرة الحب ثم الحب ثم الحب، ومع الحب كل المعجزات هتحصل، والوحش هيحلو، لكن فيه وجهة نظر تانية وانا معاها إن اللي يريحك أحسن من اللي تحبه، باختصار لأن اللي بتحبه لو غير مريح هتكرهه مع الوقت.
وخصصت مفيدة شيحة، فقرة عن اليوم العالمي للرجل، قالت من خلالها في اليوم العالمي للرجل للكائن اللي قلبه أبيض ومراته مبهدلاه!، واليوم العالمي لأشطر واحد في الكلام وبس.. المغرور الأناني.. محور الكون.. اللي كل المخلوقات وجدت لإسعاده و راحته.
وأضافت، أن :”الجدع أوي و شهم أوي و دمه خفيف مع الستات اللي برا البيت بس! أو برا البلد كلها .. ( انه الرجل المصري!)، ودي محاولة لفهم صفاته المدهشة المذهلة الجميلة الكتيرة..!.
وأكملت مفيدة شيحة، أن :” الرجل مبيحبش يسمع كلمة :كنت فين طول اليوم؟، انت كل يوم مع صحابك؟، مالك؟ عاوزة فلوس!، واعمل ايه ع الغدا؟، وليه مبتحبش تقعد معانا زي مبتتبسط مع صحابك؟، ومش هتخرج معانا؟
.. مبيحبش العياط و الزن و الشكوى و اللوم.. مبيحبش الطلبات و الحكايات و التفاصيل.. مبيحبش يكون له دعوة بأي حاجة..!، جاء ذلك خلال حلقة اليوم من برنامجها الستات.
