كتب- أحمد عبد العليم
تحدث الفنان حسين فهمي، عن الاختلاف بين جلسات التصوير في الماضي على أغلفة المجلات، وفي والحاضر على الهواتف المحمولة، مشيرا إلى دور التكنولوجيا الكبير في جعل جميع المواطنين الآن، بمثابة مشاهير.
وقال حسين فهمي خلال حواره مع برنامج The Insider: التكنولوجيا غيرت موضوع الفوتوسيشن تمامًا، زمان كانت المجلات هي اللي مهمة، بس دلوقتي السوشيال ميديا بقت هي اللي مهمة وكل واحد بقى كأنه عنده المجلة بتاعته.
وتابع قائلا: دلوقتي كمان بقى التصوير سريع، وأي حد بقى يقدر يقف قدام الكاميرا ويبقى مشهور، والموبايلات سهلت إن كلنا يبقى معانا كاميرات وده مكنش موجود أيامنا، كنا يدوب نلاقي أوتوجراف نكتب عليه ولا حاجة.
على الجانب المهني، حقق حسين فهمي نجاحا كبيرا في موسم رمضان الماضي 2023، من خلال مسلسل سره الباتع، الذي ضم مجموعة كبيرة من الفنانين، أبرزهم الفنان أحمد فهمي، هالة صدقي، أحمد السعدني، صلاح عبد الله، حنان مطاوع، أحمد عبد العزيز، ريم مصطفى، ميسرة، وآخرين، ومن إخراج خالد يوسف.
وتحدث حسين فهمي عن مشاركته في مسلسل سره الباتع، وكواليس قبوله للمشاركه به، خلال لقائه مع الإعلامية لميس الحديدي، في برنامج كلمة أخيرة، المذاع عبر قناة ON، وقال: خالد يوسف قالي عاوز أقابلك وندردش سوا، ولما قابلني أخبرني أن صعوبة الدور هي ركوبي الخيل، وقالي خايف عليك لأن فيه صعوبة وحركة كتير قلت له موافق ملكش دعوة وأنا عايز أتعب.
وتابع قائلا: تاريخ الفترة دي مهم في حياتنا، شعب بطبعه تقبل كثير من المستعمرين وكلمة الرحايا، التي ذكرها يوسف في دردشته، شجعتني لقبول الدور، لأنها كلمة ذات معنى كبير وإن كل محتل بييجي مصر بيتم دهسه زي الرحايا فتحمست للدور بمجرد حكاية خالد وكلمة رحايا، ومضيت من غير ما أقرأ لثقتي الكاملة فيه.
