كتب- أحمد عبد العليم
أعلنت المطربة الشعبية بوسي عن ندمها بالعمل في الملاهي الليلة في شارع الهرم في بدايتها.
وقالت بوسي: ” مقلتش شغلي في شارع الهرم تنازل لكن ندمانة على الشغل في شارع الهرم لكن هو علمني اتعامل مع الناس وخلاني عندي خبرة في التعامل، بصراحة مكنتش حابة أشتغل في الأماكن دي والأماكن دي مش شبهي وشفت فيها حاجات كتير ولكن كنت عيلة صغيرة وباكل عيش”، حسب لقائها في برنامج “حبر سري” الذي تقدمه أسما إبراهيم.
وتابعت: كنت مش عايزة استمر، وكنت مجبورة على الشغل وشغالة بالإكراه، واضربت عشان أنزل الشغل وتعرضت للإهانة، وبحمد ربنا إن ربنا لسه مخلي فيا عقل من اللي شوفته.
وتحدثت بوسي خلال اللقاء عن عملية التجميل الوحيدة التي أجرتها قائلة: “عملت تجميل مرة واحدة مناخيري كانت مضايقاني، كنت بحس إن شكلي بقى أحلى لكن في حاجة واقفة عقبة مش مريحاني، أنا كنت ضد عمليات التجميل وبحب نعمة ربنا، لكن مفيش مانع لو في حاجة مش مرتاحة لها أظبطها في نطاق المعقول، والحمد لله لما عملتها مرتاحة نفسيا وحاسة شكلي بقى أحلى”.
وعن تعرضها للتنمر وتعليقات ساخرة على صورها القديمة قالت بوسي: “الموضوع بيضايقني لكن مش برد، ردي بيكون بشغلي وبأغانيا، دا هو الأسلوب ومش عارفة هيستفادوا إيه، طبيعي إن كل واحد فينا في مرحلة عمرية شكله بيختلف، بعيدا عن التجميل، حال الحياة أن الشكل بيتغير مع السن”.
يذكر أن شركة روتانا طرحت أحدث أغاني المطربة بوسي بعنوان “مسولي وصبحوا”، من كلمات تامر حسين، ألحان عزيز الشافعي، وتوزيع جلال حمداوي.
