كتبت-شيماء عبدالسلام
دشن رواد موقع التواصل الإجتماعى “فيسبوك” هاشتاج “الولاية حقى”، و ذلك لعدم الأخذ بولاية المرأة فى الإقرار بتعليم أولادها وغيرها من قوانين الاحوال الشخصية التى تطبق.
و جائت تعليقات النساء كالتالى :”بنتي في كي جي 1 كانت في مدرسة مش عاجباني وكنت مرتبة نفسي انه بس السنة تخلص وانقلها لمدرسة تانية كنت فاكرة الموضوع بسيط يعني ده كي جي ومن مدرسة خاصة لمدرسة خاصة برضه في نفس الإدارة التعليمية”
وأضافت “طلع ان نقل الهرم من مكانه اسهل من الحكاية دي لفيت على مكاتب، واتبهدلت من المدرسة دي للمدرسة دي للإدارة ودول يحدفوني لدول، ويجو عند دفع الفلوس ياخدو مني عادي لكن في توقيع الاوراق الموظفة تنزلي على سنانها وتقولي هاتي الأب، جبت وسايط مع ان مبحبش بس دي واسطة علشان اخد حقي أصلا، دفعت رشاوي وكل سنة وانتي طيبة يا هانم والشاي بتاع مدام نادية لدرجة ان في موظفة عجبتها شنطة ايدي فضيتها واديتهالها عشان اخلص.
وبرضه يقولولي تمام تمام بس هاتي الأب يوقع هاتي الأب يمضي بالموافقة، يعني انا اللي ادفع المصاريف وانا اللي اجري وفي النهاية حركتنا مقيدة بالاب، لما العذاب ده كله في كي جي امال في باقي المراحل هشوف ايه، حسيت اني حد فاقد الاهلية
هل من العدل ان اشقى واتعب واجري وكل ده يطير في الهوا لان القانون شايف اني مش اهل لتقرير حياة بنتي اللي شيلتها في بطني #الولاية_حقي”.
و روى إحدى الشباب قصة عاشتها والدته قائلا:” أبويا وامى انفصلوا وانا تقريبا عمرى ٤ سنين، أبويا اختفى تماما من حياتنا وعاش بره مصر ومشوفتوش تانى الا لما بقى عندي حوالى ١٨ سنة وطول الوقت ده أمى هي الوحيدة المسؤلة عنى وعن أخواتى الاتنين، وأنا تقريبا ١٢ سنة جت لي فرصة سفر للمشاركة في معسكر كشافة بره مصر فكان لازم اطلع جواز سفر، وقتها أكتشفنا أن أمى – الي هي ولية امرى الوحيدة إلى اعرفها طول عمرى – متقدرش تطلع لي الباسبور وانه لازم ابويا، بس أبويا بره مصر معرفش اصلا فين يبقي جدي لابويا أو عمى – والي كنت للوقت ده برضه معرفهومش اصلا، المهم قدرنا نوصل لعمي عشان يجي معايا يطلع لي باسبور وكانت ده أول مرة أقابل فيها عمى”.
واضاف” أمى عمرها ما حسستني ان عندها مشكلة في تربيتنا رغم كل الصعوبات الي شافتها طول عمرها كانت بتستحمل وتتصرف لحاد لما ربت ٣ شباب لوحدها تماما، بس رغم كل تضحياتها ده فالقانون كان طول الوقت واقف ضدها مش معاها، من أول اجرائات الطلاق للنفقة للولاية … الخ.
عشان كده انا شخصيا حاسس جدا بكل كلمة اتكتبت على #الولاية_حقي ومتضامن مع كل ست أختارت رغم كل الصعوبات الي بتشوفها كل يوم انها متستغناش عن أولادها وتربيهم وتعافر كل يوم عشان تكمل بيهم”.
المواد التى يتضمنها القانون «المادة 6 التى تعطى ولى أمرها حق الطعن بعقد الزواج وفسخه تحت بند عدم التكافؤ، والمادة 89 من المشروع التى تمنع سفر الأم دون إذن الأب، بينما لم تضع قيودا على الأب فى حال كان الطفل معه أو باستضافته، فضلًا عن المادة 103 من المشروع والمرتبطة بالولاية على مال القاصر، والذى أعطى مشروع القانون الولاية للأب ثم للجد ولم يذكر الأم».
