كتبت أميرة السمان
قالت الفنانة فاطمة عيد: “حبيت جوزي سنتين قبل الجواز وقبلت أكون زوجة تانية، وقعدنا سنتين نحب بعض واتجوزته رغم أنه كان متجوز ومخلف من بنت خالته”، مضيفة “زوجي وقف قصاد أهله اللى كانوا ممانعين زواجه مرة ثانية”.
وتابعت “عيد”: “زوجة زوجي الأول ربطتني بيها علاقة قوية وكنت ألبي لها كل ما تريد، وقدرت بالمعاملة الطيبة أخليها تحبني أكتر من نفسها”، مؤكدة: “بسمع كلام جوزي والراجل لازم يبقى سي السيد، وزي ما يقولي علي أي حاجة بسمع كلامه وبثق فيه وعمري ما فكرت افتش في تليفونه وميصحش اصلا”.
وأضافت المطربة الشعبية:”أنا وزوجي شفيق وبناتي الأربعة بنصلي الفجر جماعة، وبنتي شيماء رغم حبها للغناء بتصلى كل صلاة في وقتها”، مشيرة:”كانت أمنية حياتي إن ربنا يديني ولد واحمل وأولد ربنا يديني بنت لحد لما أنجبت 4 بنات فقلت ربنا يخليلي البنات وهما ماليين عليا حياتي، وزوج بنتي بيبوس ايدي احتراما وتقديرا ليا، ولما خلفت البنات قلت ربنا مبيتعاندش وحمدته”.
وتابعت الفنانة فاطمة عيد:”دعيت ربنا إنه يحبب الناس في صوت بنتي شيماء الشايب والحمد لله استجاب لدعوتي وهي ناجحة في الغناء”، متابعة “الناس حصلها إحباط من حال الفن وأنا أحبطت من الوضع الحالي ده علشان كده مختفية”.
وأضافت:”الناس مبقتش رايقة ولا بقت تسمع زي الأول، والمطرب ملهوش ذنب في حالة الإحباط اللي بتسيطر علي الناس كلها” متابعة:”شيماء الشايب بنتي الوحيدة من 4 بنات اللى حبت الفن، وإحنا كنا داعمين ليها بقوة، وأول شريط عملته كان عمرها 7 سنين وكسر الدنيا علشان كده هي معجزة لأنها غنت لأم كلثوم”، جاء ذلك خلال لقائها ببرنامج “كلام الناس.
