أراء ومقالاتالموقع

نزار سامي يواصل كتابة «المكنز» لـ«الموقع» .. بلاش هري

اهلا .. اهلا .. اهلا .. كل عيد وكلنا يا رب بخير وبصحة وسعادة .. يا رب أيامنا كلها أعياد وفرح وسرور ودايما في احسن صحة وسرور … بلاش هري ؟؟؟ صح؟؟؟ حقيقي قعدت كتير افكر الأسبوع ده حانتكلم عن ايه .. لحد ما حصل قدامي موقف من شباب لسه في الجامعة .. وكنت بسأل حد عزيز عليا نتكلم عن ايه .. فا اتذكرت كلمة الهري!!!

طب إيه الموضوع ؟؟ طبعا احنا بنتكلم عن موضوعات تخص في المقام الأول رواد الاعمال .. بس مافيش ما يمنع انها تفيد أي حد .. لما ربط بين اللي سمعته من الشباب وبين فكرة الهري .. جت فكرة الكلام بتاع النهاردة ..

يالا بينا … من الحاجات المهمة جدا جدا جدا لأي حد ان يكون عندك حد تاخد رأيه او تستشيره .. بس المهم مين هوه ده؟؟ ويا ترى حايقولك الكلام اللي ينفعك بجد … ماهو اكيد مش مطلع على الغيب … ولا حايقولك اللي هوه يعرفه واللي هوه ده اخره … ولا حايقولك علشان يضلك ..

الحقيقة الحته دي محتاجة مجهود من الناس اللي شغالة في مجال ريادة الاعمال .. انا عن نفسي وعاى مدار العشر سنين اللي فاتو شوفت أصحاب أفكار دخلوا مسابقات وفي منهم كسبوا وفي منهم خسروا … وهووووووب السنة اللي بعديها بقوا “منتور” .. ايه الجمال ده والفخامة دي … وللأسف الناس دي بتقول أي كلام في أي كلام … لو صادف ان في حد منهم بيقرأ الكلام ده فا معلش اللي على راسه بطحه ..

طب يا ترى اتصرف ازاي انا كرائد اعمال … أولا لازم تخللي بالك ان مافيش سوبر مان بتاع المنتورز (منتورز هي جمع منتور) .. فا اللي يجي ويتكلم عن أي حاجة وكل حاجة .. اعرف على طول انه مابيفهمش أي حاجة … وعادة الناس دي بتكون صنعتها الكلام … وعنده شوية ذكاء اللي يخليه يعمل سيرش سريع على جوجل ويخبطله أي كلمتين واهي اتعشت …

دور المنتور او الكوتش … ودي قصة الفرق بينهم … وحاندخل في كلام كتير … من الاخر شوف اللي حاتتكلم معاه مين واخلص!! دور الشخصية دي انها تفتحلك المدارك … وتوريلك حاجات ممكن تكون غايبة عنك .. بس عمرها ما تاخدلك القرار … وشوفت انا شباب جميل وانا باحكم في مسابقات كتير … عندهم أفكار كويسة وحلوة .. بس الموضوع هرب منهم .. وبسألهم مانتوا كنتوا ماشيين كويس ايه اللي حصل .. معظم الإجابات .. ان ماكنش كلها بتقول .. اصل المنتور قالنا اعملوا كده … وهنا الكارثة … المنتور عمره ما يقولك اعمل وما تعملش … المنتور بيوضحلك الطريق .. يحطلك اتجاهات .. بس هوه مين اللي سايق؟ انت او انتي طبعا

يبقى … ابص على ايه مع عم المنتور؟؟ بص على مجاله .. خبرته العملية ومش عيب تسأل او تسألي .. انت مين وعملت ايه وخبرتك العملية ايه .. وهل بيفهم ومتخصص في حاجة واحدة ولا منتور ابوشنطة وشغال سريح؟؟ كلام تقيل .. بس دي الحقيقة

طيب دور الجهات الداعمة ايه؟ الله يسعدكم ركزوا في اختيار المنتورز … ده في واحد كان طالب عندي .. وجه يطلب مني يدخل مجال ريادة الاعمال .. أصلا ماكنش بيعرف ينطق الكلمة بالانجليزي .. وسبحان الله .. بقى خبير ريادة اعمال .. وربنا يسهلله وللي زيه!!

طب ده من وجهة نظر ريادة الاعمال … انما لما اتكلمت مع الشخصية اللي قولتلكم عليها في الأول .. كان عندها فكرة “النصيحة” .. ازاي الواحد ياخد نصيحه من حد ويختار مين ؟؟ اهل ثقه ولا اهل خبره!!!! وازاي يعرف نصيحتهم دي مخلصه و يهمهم مصلحتك ولا لاء .. لان في مقوله بتقول: اذا اخبرك احد انك لن تستطيع فهو يخبرك عن حدود امكانياته هو وليس انت .. ميتهيألي النصيحه دي مهمه لما الواحد يكون بيبتدي مشروع جديد او داخل مجال او سوق جديد خبراته فيه قليله .. كمان المصادر كتير والهري والفتي اكتر

يا ترى عندنا إجابات عن مقولة صديقي دي واسئلته علشان نوصل لي “بلاش هري” … ولا ايه؟ شاركوني الرأي

كل عيد وانتم طيبيين ومبسوطيين .. القاكم على خير ان شاء الله .. تحياتي

نزار سامي يكتب لـ«الموقع» مقالات المكنز .. الجمهورية الجديدة و حياة كريمة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
Ad
Ad