أراء ومقالاتالموقع

نزار سامي يواصل كتابة «المكنز» لـ«الموقع» .. التكنولوجيا والمترو

كل سنة وانتم طيبين … بمناسبة ايه؟ بمناسبة بداية فصل الخريف … ايه الاخبار؟ هل من جديد؟ اخبار الأسبوع ايه؟ انا عندي حاجات برضه كتيره الحمد لله .. المهم مش عايزين ننسى الابتكار .. ريادة الاعمال .. التنافسية .. التكنولوجيا .. كل ده ليه؟ علشان يبقى الأثر .. يالا بينا

الأسبوع ده مصر كانت بتستضيف المؤتمر الدولي الثلاثين الخاص بالجمعية الدولية لإدارة التكنولوجيا .. المؤتمر كان بعنوان “التكنولوجيا من اجل عالم المستقبل” .. طيب يعني ايه الثلاثين؟ يعني بيتعمل بقاله 30 سنة .. ابتدى في أمريكا على ايد الأستاذ الدكتور طارق خليل – مؤسس الجمعية الدولية لإدارة التكنولوجيا ومقرها ميامي في أمريكا من 1989 .. دكتور طارق هو استاذي وادين له بالفضل في كتير من الإنجازات اللي حصلتلي على مدار ال 12 او 13 سنة اللي فاتت .. دكتور طارق هو الاب الروحي لإدارة التكنولوجيا في العالم اذا جاز لينا التعبير

المؤتمر استمر على مدار 5 أيام بداية من يوم الاحد 19 سبتمبر وكنت عملت انا فيه ورشة عمل عن حاجة اسمها التفكير التصميمي (Design Thinking) .. يطلع ايه ده؟ ده بمنتهى البساطة ازاي نلاقي حلول لتحديات حولينا بس الحلول دي تكون في المقام الأول بتهتم بالإنسان .. ممكن نبقى نتكلم هنا مرة بالتفصيل لو تحبوا

من يوم الاثنين ليوم الخميس كان في محاضرات عامة كلها اتبثت على صفحة المكنز وكمان في جلسات خاصة بالسادة المشاركين بالأوراق البحثية بتاعتهم .. لو بصينا على الأرقام حا نلاقي ان عدد الأوراق البحثية المقبولة 144 ورقة بحثية تم مناقشتها على مدار 4 أيام .. طبعا ابتدى المؤتمر بأول جلسة عامة للدكتور عمرو طلعت وزير الاتصالات وتكنولوجيا المعلومات عن تأثير التكنولوجيا في حياتنا والتحول الرقمي والمهارات المطلوبة للشباب وغيرها من الموضوعات .

ويوم الثلاثاء كانت الجلسة العامة للدكتور القدير محمد العريان .. وكانت بعنوان “أسأل محمد العريان” .. والحقيقة ان دكتور محمد مش بس شخصية عالمية فريدة من نوعها انما ابن بلد اصيل … ومفكر .. مفكر بمعنى الكلمة .. دمج بين الاقتصاد والتكنولوجيا والعالم رايح على فين وابتدى يحط تعريفات سلسة لشوية كلمات ناس كتير مش عارفة تفرق بينها زي ايه الفرق بين “Resilience” و “Agility” .. وجاوب على أسئلة كتير شيقة جدا .

يوم الأربعاء كانت الجلسة العامة عن التوجهات المستقبلية في إدارة التكنولوجيا كاعلم يدرس في الجامعات .. وسمعنا خبراء من أمريكا وجنوب افريقيا ومصر وكل واحد بيتكلم من منظور او من فلسفة … انما الجلسة دي ابتداها استاذي الجليل طارق خليل وجاب التاريخ اللي بيه حط اساسيات علم إدارة التكنولوجيا .. اللقاء ده انا شايفة تاريخي لكل واحد عايز يفهم او يفكر عايز يتعلم عايز يعمل ايه .

يوم الخميس والأخير كان جلسة لا تقل أهمية عن الجلسات السابقة وكانت بتناقش الموضوعات الملحة في إدارة التكنولوجيا واستخداماتها … وكان في الجلسة بإدارة السيد “جيف بيتس” نائب الرئيس التقني لشركة أي بي ام العالمية .. وكان في الجلسة الدكتورة ديمة العدل .. وخلينا أتكلم عن ديمة شوية .. هي دكتورة شابة من المملكة العربية السعودية .. شعلة من الذكاء والنشاط .. واكيد لا ننسى ان نبارك لجميع أصدقائي من السعوديين بمناسبة اليوم الوطني للمملكة .. حقيقي ديمة مثال رائع للبنت السعودية .. البنت العربية .. شطارة وذكاء وذات مستوى عالمي وتكون قدوة ا

لبنات كتير .. ديمة متخصصة في الذكاء الاصطناعي وتكنولوجيا المستقبل بالمناسبة .. وكان في الجلسة السيد نيكولاس نائب رئيس القطاع الحكومي في شركة أي بي ام العالمية .. والدكتور محمد عزام زميل الكفاح في إدارة التكنولوجيا .. جلسة فيها عصف ذهني من نوع مختلف لاهم الموضوعات اللي بتمس إدارة التكنولوجيا .

الظريف ايه … وانا مروح من المؤتمر وراكب المترو .. قعدت ابص على الناس اللي حوليا .. نسبة كبيرة جدا منهم ماسكيين الموبيل ومركزيين اوي .. يا ترى بيعملوا ايه؟ لحد ما ركب اب وابنه .. وكانوا بيتكلموا عن موضوع شكله مهم او خطير .. ومركزيين فيه جدا .. ومره واحدة الاب اخد تليفونه وقعد يدوس على كام حاجة كده .. قولت بسسسسسسسسسس …. بيعمل حاجه او بيحسب حسبه

.. المهم طلع انه بيلعب جيم على الموبيل … بصيت على اللي حوليا طلعوا كلهم بيلعبوا جيمز .. وهنا افتكرت الجلسات اللي في المؤتمر وان يعني ايه التكنولوجيا الملائمة .. يعني ايه التكنولجيا لخدمة الانسان والمجتمع .. يعني ايه نشر وتوطين التكنولوجيا .. يعني ايه تحول رقمي .. يعني ايه حماية وسرية البيانات .. يعني ايه العمليات الرقمية .. يعني ايه ويعني ايه ويعني ايه … أتصور كده التكنولوجيا قربت انها تبقى في ايد الجميع .. التكنولوجيا والمترو

النهاردة كمان كان عندي لقاء في سي بي سي اكسترا وكان الحديث عن حماية البيانات الشخصية على الانترنت وازاي نخلي بالنا وكده .

القصد من كل ده .. التكنولوجيا جايه جايه .. لازم نستعدلها … ونوظفها التوظيف الأمثل غير كده حانبقى في موقف لا نحسد عليه ..ز يالا شدوا حيلكم والقاكم على خير الأسبوع الجاي ان شاء الله ان كان في العمل بقية ورحلة جديدة وتجربة جديدة .. مع التحية

نرشح لك

نزار سامي يواصل كتابة «المكنز» لـ«الموقع» عن ريادة الوطن

نزار سامي لـالموقع المكنز  التثقيف ولا الأمية

نزار سامي يكتب لـ«الموقع» مقالات «المكنز»  اهلا أمازون

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
Ad
Ad