أراء ومقالاتالموقع

نزار سامي يكتب لـ«الموقع» مقالات المكنز .. الجمهورية الجديدة و حياة كريمة

اهلا بيكم … عاملين ايه؟؟ الحقيقة المقال النهاردة يبان عنوانه مختلف .. انما لو ركزنا حانلاقيه هوه في صميم فكرة المكنز … المكنز اللي بيدور على الكنز في كل حتة وكل شبر في مصر .. يالا بينا نشوف …

يوم 15 يوليو .. ده يوم أصلا من الأيام والتواريخ الدولية .. هوه اليوم العالمي لمهارات الشباب … وطبقا للأمم المتحدة فاليوم ده السنة دي جاي بي اسم “إعادة تصور مهارات الشباب بعد الجائحة” … حاتلاقوا الأمم المتحدة بمناسبة اليوم ده بتتكلم عن موضوعات كتير ليها علاقة بمهارات الشباب بس مركز على دور التعليم الفني والتدريب والمهارات وكده وعلاقة ده بالتوظيف والتنمية المستدامة

طيب شكرا .. وبعدين؟؟ اليوم ده برضة تابعنا فعالية جميلة وسيمفونية شابة عن حياة كريمة .. وعن جمهورية جديدة … فكر جديد … فكر شباب … فكر مستدام

حقيقي كل ثانية في شريط الاحتفال ده بتوري مكان الكنز … المكنز يعني .. الناس اللي حضرت … التنظيم … الشياكة … الجمال … والاهم من كل ده المضمون … كلمات من القلب … تصرفات وردود أفعال من القلب بتوري ان الدنيا فيها احسن

طب ياترى … هل في علاقة بين جمهورية جديدة … وحياة كريمة … واليوم العالمي لمهارت الشباب؟؟ من وجهة نظري انه اه في طبعا علاقة واضحة جدا

جمهورية جديدة … بفكر شاب … لحياة كريمة … في قالب عالمي … يعني من الاخر لازم نبص على العالم وصل لفين ونبص بنفس المنظور … الحياة الكريمة بمنظور مختلف .. طب فاكرين ماحنا اتكلمنا عن هرم الاحتياجات .. بتاع ماسلو .. فاكرينه؟ اللي بيتكلم عن الاحتياجات الفسيولوجية … والاحتياج للامن والأمان والسلامة … والاحتياج للانتماء … والاحتياج للتقدير والاحترام .. وفي الاخر الاحتياج الى تحقيق الذات … بنتكلم عن احتياجات .. يعني مش رفاهيات وزيادات .. لاء دي حاجات ما نعرفش نعيش من غيرها …

طب ما تيجوا نحط كل ده مع بعض .. حانلاقي الخلطة الجديدة بتاعت الجمهورية الجديدة .. الجمهورية اللي كلنا بنحلم بيها … شايفين الحلم .. بنتحرك ليه .. كلنا ايد واحدة يعني احنا في رباط الى يوم الدين .. هدفنا واحدة وهو الحياة الكريمة

ماشي الحال … طب تفتكروا ايه المطلوب من كل واحد فينا … كلمات اتقالت بصريح العبارة .. النيه الخالصة .. خليك قوي وشجاع ماتخافش غير من اللي خلقك .. في ناس مما بتنامش علشان احنا نرتاح وننام .. وطبعا كلمة شكرا مهمة اوي اوي اوي .. يا ترى عايزين تقولوا شكرا لمين

اينشتاين قال كام حاجة ظريفة … قال … التغيير هوه الثابت الوحيد في الدنيا … علشان كده محدش بقول كلمة “منا اصلي جرب زمان ومنفعش” انهي زمان؟ الدنيا بتتغير … وقال كمان … لو اديتوني ساعة من الزمن علشان احل مشكلة .. فاحاقعد 55 دقيقة علشان افهم المشكلة و 5 دقايق علشان الاقي الحل … وقال … لو جيت تحل المشكلة بنفس العقلية اللي اتوجدت فيها المشكلة فا سيادتك حاتوصل لنفس النتايج .. وطبعا اكيد حاتفتض تشتكي … يبقى الحل ايه تفتكروا؟؟

فكروا كده شوية؟؟ ماشيين لي 2030 … جمهورية جديدة … مهارات الشباب … علشان حياة كريمة … تلات جمل بس ايه السهل الممتنع … يالا نحطهم جنب بعض وكل واحد فينا يبتدي … زي الشباب الجميل اللي ابتدى … ابتدي بس ومالكش دعوة .. الباقي مش بتاعك … ربنا عايزك تسعى وهوه حايتولى الباقي ..ز بس ابتدوا يالا

عموما .. ادينا داخلين على عيد … إجازة مزيكا … استمتعوا بيها … بس فكروا … وماتنسوش العيدية … العيدية بتاعتنا من كل واحد لكل واحد … كل سنة وانتم طيبين وعيد سعيد علينا جميعا … الجمهورية الجديدة … فكر جديد … فكر شاب … مهارات المستقبل … توكلوا على الله ما تقلقوش وبلاش هري … القاكم على خير الأسبوع الجاي

نزار سامي يواصل كتابة مقالات المكنز هتتصرفوا ازاى ؟

مقالات ذات صلة

زر الذهاب إلى الأعلى