أراء ومقالاتالموقع

نزار سامي يكتب لـ«الموقع» بني سويف المصنع المفتوح

يا اجمل تحية عليكم أصدقائي الأعزاء ودايما يا رب في خير وصحة وسعادة .. لقاء جديد وجولات جديدة من الشرق والعرب .. الشمال والجنوب .. طبعا زي ما هو واضح من العنوان .. حانتكلم عن بني سويف … كنت في الأول عايز اختار اسم للمقال .. كنت حاخليه “ام علي لاميرا” .. مين ايه فين؟ ام علي معرفوه .. لاميرا ده بقى حاولوا تعرفوا ده يطلع ايه .. شوفوها في الصورة ?

النهاردة ٣ ديسمبر .. اليوم العالمي لذوي الهمم .. بعنوان القيادة للوصول الى عالم شامل وميسر ومستدام بعد جائحة كورونا .. كل سنة وانتم طيبيين

المهم الأسبوع ابتدى السبت بافتتاح المقر الرئيسي لنادي ريادة الاعمال بأكاديمية البحث العلمي والتكنولوجيا وبعدها كان في ندوة عن ربط البحث العلمي بريادة الاعمال حقيقي كانت ندوة متميزة .. احب اشكر كل الناس اللي حضرت وشاركت ونقول مبروك لكل فريق العمل بقيادة دكتور محمود صقر ودكتور عمرو فاروق ودكتورة وفاء عبد الرشيد وبالتوفيق دايما .. الظريف ايه .. كان في فيديو بيعرض أنشطة نوادي ريادة الاعمال وفي الاخر لاقيت ايه؟؟ ها ها ها؟؟؟ لاقيت .. ويبقى الأثر ?

طبعا .. ايديكس ٢٠٢١ … حد سمع عنه؟؟ ده الجمال كله ..

ايه بقى بني سويف وحكايتها؟ بني سويف حقيقي كنز جديد من كنوز مصر .. ارض النباتات الطبية والعطرية .. شوفنا شوية صور من فترة عن ارض النعناع اللي مليانه اخضر اخضر اخضر … واللي شاف الصور دي حس فعلا بريحه النعناع البلدي طالعة عليه … صح؟؟ الله عليكي يا مصر .. انا سألت عن الحتة دي طلعت قرية اسمها الفشن .. دي واحدة من حبه تانية كويسين ..

في تدريب في القرية الذكية اللي في بني سويف (تبع سيليكون واحة الجهات التابعة لوزارة الاتصالات) .. مكان اكتر من رائع ومتجهز حاجة ممتازة .. بس للأسف … فااااااااضيييييييييي … عايزيين نعمل فيه أنشطة ريادة اعمال

هنا في مجموعة جميلة من اهل بني سويف معاهم أفكار لمشروعات رائعة وكلهم حماس .. مشروعات في الصحة والتجارة الالكترونية والطباعة والتعليم والزراعة ومعالجة المخلفات والانشاءات … حاجة جميلة .. باشكر كل الناس اللي قائمين على الشغل الجميل ده في ستارت اب فاكتوري .. مونتي .. ميرو .. فاطمة وجبر .. عاش يا شباب

في النص كده اتكلمت مع ميزو صديقي بقالي كتير ماشفتوش .. بقوله اخبار مشروعك ايه يا بطل وكنت سامع انه ابتدى يشد حيله في مجال الاستشارات والتعليم وكده .. لاقيته اختلف مع الشركا .. وسابوا بعض .. اوووبسسسسس .. وهنا الخلاف كله … اول ما بتيجي الفلوس … الخناق بيشتغل .. وسيبك بقى لا تعليم بيفرق ولا ده معاه دكتوراه ولا حتى اهله مين .. ساعه الخلاف الأصل والتربية بتبان .. وللأسف حسن النية بيتفهم غلط … طبعا شريكه نايمه في العسل علشان يخلع منه ووعده وعود مانفذش منها ولا حاجه … عادي !! فا بقوله اصل الشراكة دي زي الجواز الكاثوليكي ما ينفعش تسيبوا بعض .. قالي اه والله .. بس للأسف اطلقنا … هاهاهاهاهاها .. وقالي مش بس كده .. لا وايه في امان الله لاقيت اللي كان شريكي رافع عليا قضية .. مع ان كنا متفاهمين ساعة التخارج بس للأسف ماكتبناش حاجة على ورق!!! الله يعينك يا ميزو يا صاحبي .. اقولك ايه بس الأصل بيبان سيبك من المظاهر والاستايل … ربنا يكرمك .. انت بتبتدي من صفر صحيح بس ربنا يكرمك .. ما تنساش يا ميزو .. ويبقى الأثر

يا رب يكتر افرحنا .. يا رب .. على الماشي بقى .. دي تاني مرة ازور فيها بني سويف .. بس حقيقي البلد هنا تمشي في أي حته تلاقي فرح .. بين كل فرح وفرح في فرح ? .. يالا عقبال السامعين

ايه بقى حكاية المصنع المفتوح؟؟ ده مشروع بين الاتحاد الأوربي والحكومة المصرية مدته تلات سنين والهدف منه تطويرالصناعات النسجية و الجلدية في مصر .. المشروع بيضم مين بقى .. بيضم جامعة القاهرة والمركز القومي للبحوث ومركز تحديث الصناعة وغرفة الصناعات النسجية وغرفة الصناعات الجلدية وثلاثة مشاركين أوربيين أيطاليين وهم هيئة بروجيستو سيد وجامعة لنك كامبس وبيت الخبرة سيركام .. يوم الأربعاء 17 نوفمبر .. كان نهاية تدريب اول مجموعة من أصحاب المشروعات النسجية والجلدية الصغيرة ورواد ورائدات اعمال في نفس المجال وكل دول عددهم 24 مشروع وحوالي تقريبا 40 متدرب .. استمروا في تدريب أسبوعي لمدة شهرين ونص .. اتعلموا الجزء الفني .. اتعلموه على ايد الأساتذة الدكاترة أعضاء هيئة مركز البحوث النسجية اللي اتحول لسه من كام أسبوع الى معهد بحثي … نقول مبروك للدكتورة اميرة رئيسة المعهد على الخطوة الجميلة دي .. من الشهرين ونص قعدنا اربع أسابيع تدريب على ريادة الاعمال والابتكار والاستدامة .. موضوعات جديدة جدا على الشباب .. شباب زي الورد بتجمعهم روح المحبة والتعاون وطبعا خفة الدم والنشاط والحيوية .. تخيلوا .. كنا مرة اخدنا تدريب عن ازاي يعرضوا مشروعاتهم .. كنا ابتدينا العرض بمدة 3 دقايق .. عايز اقولكم اننا لما اخر واحد خلص كان بيعمل العرض بتاعه في 18 ثانية .. ايون شوفوا الفرق قد ايه … كله بالتمرين والتركيز .. وعلى مدار يوم الحد والتلات كل الفرق عرضت المشاريع بتاعتها باحترافية شديدة
طبعا لازم نقول شكرا .. طبعا .. د. اميرة مايسترو معهد بحوث الصناعات النسيجية و د. يحي دمث الخلق والعزيز د. تامر اللي شايل مشروع المصنع المفتوح على كتفه ماشي بيه ليل نهار .. ودكتورة وفاء رمز الشياكة والاتقان .. ود. رانيا حيث الحماس والنشاط ود. ايمان سويلم النشيطة المتعاونة وكل فريق العمل الجبار .. طبعا صديقي العزيز د. محمد خليف صاحب النظرة والدم الخفيف .. والبطولة المطلقة الحقيقة لكل أصحاب المشاريع اللي حضروا التدريب وكملوا للاخر .. لو قعدت اشكركم من هنا للصبح مش حاخلص .. دي بس البداية .. فهمنا حاجات كتير ماكناش نعرفها .. بصينا على الجمهورية الجديدة بشكل مختلف … احنا مش قوليليين … مصر جميلة وتستحق كل جميل .

اقرأ ايضا للكاتب

نزار سامي يكتب لـ«الموقع» المكنز «يالا بقى الكباش والكوميسا»

نزار سامي يكتب لـ «الموقع» فروق عديده بين العلم والمعرفه

نزار سامي يكتب لـ «الموقع» المكنز ..بيبي برينور

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
Ad
Ad