أراء ومقالاتالموقع

نزار سامي يكتب لـ”الموقع” المكنز .. بيت رواد الاعمال والأركان التمانية

 

اهلا بيكم في عالم ريادة الأعمال .. العالم الفريد الغريب اللي مليان قصص وحكايات … قصص نجاح وقصص فشل اكتر .. اكيد كل واحد فينا نفسه يحقق هدف في حياته .. واكيد كمان عايز يكون متميز .. علشان كده من خلال مجموعة المقالات حانكتشف اسرار ريادة الاعمال وكمان الابتكار فاحنمشى مع بعض خطوة خطوة من اول الفكرة لحد ما نوصل نكون شركة ونقدم منتج او خدمة ننفع بيها الناس.

حانتكلم على المعرفة و الادوات و المهارات اللي لازم تكون موجودة عند رائد الاعمال والاهم من كده هو التطبيق علشان تحول فكرتك لحقيقة وواقع .. بس الأهم من كل ده هو انت .. انت .. ايوه انت .. لو عندك الرغبة انك تكون احسن واحسن .. فأكيد حتكون .. بس لو معندكش الرغبة انك تبقى احسن فده حيخللى الطريق طويل عليك

يا ترى حد سأل نفسه اصل كلمة “انتربرينور” (Entrepreneur)اللي ابتدت تتداول بكثرة الأيام دي ايه؟ هل هي فعلا معناها ريادة اعمال؟ المفاجأة ان اصل الكلمة ماكنش ليه علاقة بمفهوم ريادة الاعمال … الأصل في كلمة “انتربرينور” هو كلمتين فرنساوي مش كلمة واحدة .. تعالوا نشوف .. الشق الأول “انتر” يعني “ما بين” والشق التاني “برينور” ودي أصلا طلعت صفة ومعناها “الاخذ” يعني “الشخص الاخاذ” يعني مافيش ولا جزء ليه علاقة بريادة الاعمال للوهلة الأولى … طيب ايه العلاقة بريادة الاعمال؟ العلاقة ان كلمة ” انتربرينور ” هي بتوصف حالة الشخص اللي قرر يكون رائد اعمال .. هو شخص بيكون في مرحلة انتقالية او مرحلة بينية … يعني قرر يبدأ مشروعه بعد ما كان بيشتغل في وظيفة معينة .. قرر يسيب حالة الراحة والحياة الاعتيادية ويتحرك لمنطقة جديدة في حياته لسه ما يعرفش عنها حاجه وبكده يكون حقق الشق الأول من الكلمة انه “ما بين” … علشان يقدر يعمل الخطوة دي لازم يكون بياخد شوية حاجات معاه في رحلته الجديدة الغامضة .. فمثلا لازم ياخد بالاسباب و كمان لازم يكون في رحلته انه يمتاز بالجراءة و الشجاعة وكمان المخاطرة علشان ينتهز الفرص اللي حوليه ويستفيد منها علشان يقدم منفعة للناس او اللي بنسميها ساعات بالقيمة مضافة حقيقية للناس اللي حواليه وبكده يكون الشق التاني من الكلمة “برينور” … طيب “رائد اعمال” دي ترجمتها بالانجليزي ايه؟ ترجمتها “Business Pioneer” يبقى الخلاصة ان “الانتربرينور” دي مش وظيفة زي ما في ناس لما بتسألها حضرتك بتشتغل ايه فا يرد يقول انا باشتغل انتربرينور او باشتغل رائد اعمال وطبعا دي غلطة … اتفقنا؟

رواد الاعمال دول بقى ممكن نقسمهم لتلات انواع … النوع الأول: رائد الاعمال في صورته اللي ناس عارفها انه واحد بيعمل مشروع مربح … النوع التاني: رائد اعمال مجتمعي .. وده الشخصية اللي بتفكر في مشروع يحل مشكلة في المجتمع في المقام الأول والاهم من كده يكون مشروع مربح ويعمل من وراه فلوس ، يعني مش اعمال تطوعية ولا هي اعمال خيرية دي اعمال بتخدم المجتمع وتكون بتحقق ربح وربح كبير كمان … يا ترى زي ايه؟ حد ممكن يفكر ويقولنا؟ .. والنوع التالت: رائد الاعمال المؤسسي .. وده شخص فيه كل صفات رائد الاعمال بس مش عايز يفتح مشروع خاص بيه ولكن بيحب انه يشتغل في شركة او جهة او مؤسسة وبيحب انه يطور من شغله ويعمله بشكل افضل علشان برضه يكون متميز ويحقق المنفعة منه

طيب يا ترى ايه بقى كلمة المكنز دي؟ معناها ايه؟ ايه اللي احنا محتاجين نعرفه عن رائد الاعمال؟ محتاجين نتعرف على الأركان التمانية لريادة الاعمال وهي ركن: الفريق – الأفكار – السوق – الفلوس – الإدارة – نماذج الاعمال وأخيرا ركن النجاح دي الأركان اللي حانتكلم عنها في المقالات اللي جاية ان شاء الله

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
Ad
Ad