أراء ومقالات

نزار سامي يكتب “المكنز” .. كبسولة الشفاء

اهلا وسهلا بيكم في مقال جديد وحصاد أسبوع جديد بنشوف بعدسة الابتكار والتكنولوجيا وريادة الاعمال شويه من الاحداث اللي بتعدي علينا وبنحاول نطلع منها شوية دروس كده على الماشي .. اليوم أصلا النهاردة لوحده مليان دروس وعبر للصبح فما بالكم بباقي الأسبوع … يالا جاهزين

 

ابتدينا الأسبوع بوبينار مع الأستاذ الدكتور عمرو سليمان  أستاذ الصحة النفسية وعلوم الاعصاب المعرفية .. جملة تخض “علوم الاعصاب المعرفية” .. حقيقة ده يعتبر اقصر وبينار عملته مدته 57 دقيقه .. بس ايه .. نقاوة والخلاصة كلها .. ياترى الصحة النفسية دورها ايه في مجال الابتكار وريادة الاعمال .. وحقيقي خليني اقولك ان دكتور عمرو من الأشخاص النادرين اللي استطاعوا يسخروا لعلم ويخلوه يمشي بين الناس بالسلاسة والبساطة … وهي دي العقلية الابتكارية .. العبقرية في البساطة مش في الكعبلة .. فاكرين الناس اللي كانت بتاخد دروس في ثانوية عامة مع زرنيخ الكيماء … وانتيخ الفيزيا .. علشان بيكعبلوا المعلومه ولا علشان ايه؟ ايوه .. علشان بيبسطوا المعلومة ويخلوها ميه .. السهل الممتنع .. اهوهوه ده .. دكتور عمرو قدر باعبقريته المصرية العالمية الوصول للمعادلة دي .. عمرو .. مع حفظ الألقاب بيتكلم مع العلم .. العلم كائن حي وهو بيتكلم معاه وبيوظفه صح … ربنا يحميه ..

 

المهم في اخر اللقاء .. دكتورنا العزيز اطلق مبادرة “شفاء” .. كفاية الاسم يخليك ترتاح أصلا .. وهي عبارة عن مجموعة من الأنشطة والفعاليات بس اهم حاجه انها حاجات شاملة … يعني الكل حايستفاد منها ..

 

ابتداها دكتورنا العزيز بـ “كبسولة شفاء” .. وأول كبسولة كانت النهاردة وبيتكلم فيها عن المقارنة بتسرق فرحتك … اتفرجوا عليها .. هي على بعضها 55 ثانيه .. بس في الجون ..

 

الظريف ايه بقى ان صديقي العزيز محمد خليف .. لاقيته حاطط بوست بيتكلم عن القدرة  على تقبل الفكر وأراء الغير … اصل بعيد عنكم في حبة رواد الاعمال مجرد ما تقوله رأيك .. يا خبر .. نار تضرب في وشك … مش بس رواد اعمال .. في ناس في حياة كل واحد فينا بالطبع المنيل ده .. ده انا شوفت ناس .. يتقبلوا التوجيه الغلط او الرأي من أي حد الا منك انت .. تبقى كارثة .. وفي الحقيقة الحمد لله .. بيلبسوا في الحيط .. يالا باشفا .. من الاخر كده اللي يسيبك مرة وما يعرفش قيمتك .. ده ما ينفعش في مجال الابتكار وريادة الاعمال

 

تعالوا بقى نطلع على الجونة … ونقول .. الله عليك يا أستاذ .. مش عايز حد يضحك .. طبعا شفنا اللي حصل والحريق اللي حصل في موقع المهرجان .. وفي اقل من 24 ساعة .. طلع نجيب يقول .. فين الحريقة اللي بيقولوا عليها دي .. الله عليك يا أستاذ .. طب ده درس في الرسك .. اللي هي المخاطر .. والرسك يحب الخفية .. شوفتوا اتحركوا ازاي .. دي فيها دروس من هنا للصبح .. ليدرشيب .. قيادة يعني .. إدارة موارد .. كفاءة وفاعلية .. مرونة .. توافق عصبي وعقلي وعضلي .. طبعا ناس حاتقولك الفلوس تعمل كل حاجة .. صحيح .. بس لو الفلوس دي في ايد حد مش واعي وفاهم بيعمل ايه …  فا حايلبس الناس كلها في الحيط ..

 

طب يا ترى بقى شباب رواد ورائدات الاعمال … عندكم الخفة والرشاقة والسلاسة في الأداء؟ الله عليك يا أستاذ

 

طبعا الجونة فيها مسابقة سينماتيك  لريادة الاعمال في مجال السينما .. وطبعا عدلي توما والشباب اللي معاه هما ابطال المسابقة .. برافو برافو برافو … الله عليك يا أستاذ ..

 

حاجات كتير .. عدسة الابتكار وريادة الاعمال مابتخلصش .. يالا ما تنسوش .. كبسولة  شفاء من وصايا سليمان علشان يبقى الأثر ..

 

القاكم على خير الجمعة الجاية .. ودي حاتكون مفاجأة .. علشان حايكون يوم الخميس هوه 21 أكتوبر 2021 .. التاريخ الرسمي لوبينار مع نزار .. حانشوف فيه ايه .. استنوني .. سلام مؤقت

 

 

 

 

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
Ad
Ad