“بنام معاه في السر ومبسوطة”.. “الموقع” يرصد غضب السوشيال ميديا على رسالة سيدة مجهولة

كتبت- دعاء رسلان

استشاط رواد فيس بوك غضبًا على رسالة من مجهولة على أحد جروبات المشاكل الحياتية على موقع التواصل الاجتماعي “فيس بوك”.

وتقول المجهولة في رسالتها: “أنا أم لـ3شباب وجوزي متوفي تعرفت على واحد على النت وبعدين كتبنا ورقتين عرفي على أيد محامي صاحبه وأخدنا شقة إيجار جديد وبروحله وولادي في الشغل.. ومحدش يعرف نهائي بس أنا مبسوطة أوي معاه هل كده غلط وحرام ولا لازم أعرفهم ؟”.

وأنهالت التعليقات من رواد “فيس بوك” على الرسالة المجهولة، حيث كتب محمد أسامه جمال الدين: “على فكرة إنت لو اتجوزتي حتى لو رسمي عند مأذون لكن بدون ولي فهو جائز قانونا لكن باطل شرعا”.

وعلق رضا السيد: “غلط أنه عرفي ومش حرام ولا غلط أنك تتجوزي رسمي والاشهار بما أنك سعيدة مع هذا الشخص”.

وكتبت إحدى رواد فيس بوك: “تزوجوا بالحلال وأعلمي أولادك ومحدش بيمنعك.. دي حياتك الخاصة انت حرة فيها.. بس أعملي الصح.. لأن كده بتكبري القصة ولو يعرفو أولادك من حد غيرك بتنزلي من عنيهم ومش هيحترموكي ولا حتى يسمعوا منك”.

وعلق أيمن زيد: “لازم تعرفيهم لأن أفرضي حد منهم أو صحابهم شافك داخلة مع واحد ميعرفهوش شقة هتكون مصيبة هيموتوا زوجك أو يموتوكي..شوفي طريقة تفاتحيهم في الموضوع ويجي يطلبك منهم رسمي”.

وكتبت يسرا الليثي، إحدى رواد فيس بوك: “مافيش حاجة بتستخبى وعشان الجواز يجوز لازم الاشهار.. بمعني أن الكل يبقى عارف وولادك أولهم وبعدين أتقي شر الشبهات ممكن حد يشوفك طالعة لفلان وطبعا مش عارف ويبلغ واحد من أولادك وتحصل مشكلة كبيرة وممكن حد يضيع بسببك المهم لازم الإشهار وعشان ربنا يرضى عنك وسيبك من الانبساط وراعي وخافي من رب العباد”.